“L-istedina tal-President Nausėda waslet f’mument sinifikanti ħafna, peress li din is-sena timmarka t-tletin anniversarju minn meta ż-żewġ pajjiżi tagħna waqqfu relazzjonijiet diplomatiċi fl-1994,” stqarr il-President ta’ Malta George Vella.
Il-President George Vella u s-Sinjura Vella bdew Żjara Uffiċjali fil-Litwanja. Huma ġew milqugħin mill-President tal-Litwanja, Gitanas Nausėda, u s-Sinjura Diana Nausėdienė fil-Palazz Presidenzjali, fejn wara ċ-ċerimonja uffiċjali ta’ merħba, il-President intlaqa’ mill-President Nausėda għal taħditiet uffiċjali.
Il-Presidenti indirizzaw fid-dettall u kkundannaw il-gwerra illegali u mhux provokata tar-Russja fl-Ukrajna. Il-President Vella spjega kif din iż-Żjara għandha wkoll l-għan li tkun espressjoni ta’ appoġġ lil-Litwanja u lill-poplu tagħha fid-dawl tal-avvenimenti terribbli li qed iseħħu fl-Ukrajna. “Malta kkundannat b’mod ċar dawn l-atti u ssostni li l-awturi tar-reati jridu jinżammu responsabbli,” qal il-President Vella.
Il-President iddiskuta wkoll il-mewġa ta’ instabbiltà u nuqqas ta’ sigurtà li għaddejja bħalissa fl-Afrika ta’ Fuq u fil-Lvant Nofsani u kif din ser ikollha effetti fuq l-Ewropa jekk ma tiġix indirizzata bħala prijorità. Fir-rigward tal-gwerra li għaddejja bħalissa bejn Iżrael u l-Ħamas, il-President Vella qal li “paċi ġusta u dejjiema fir-reġjun tista’ tinkiseb biss b’waqfien permanenti mill-ġlied”.
Il-President Vella nnota li din is-sena ser tara lil Malta u l-Litwanja jikkooperaw mill-qrib ħafna fil-livell multilaterali. “Bħala pajjiżi żgħar, it-tnejn li aħna napprezzaw il-valur li l-multilateraliżmu effettiv jagħti lill-komunità internazzjonali,” stqarr il-President filwaqt li rringrazzja lill-President Nausėda għall-appoġġ tal-Litwanja lil Malta fit-twettiq ta’ dmirijietha fil-Kunsill tas-Sigurtà tan-Nazzjonijiet Magħquda kif ukoll fil-Presidenza tal-Organizzazzjoni għas-Sigurtà u l-Kooperazzjoni fl-Ewropa għas-sena 2024.
Waqt it-taħditiet, il-President Vella wassal ukoll l-appoġġ u l-inkoraġġiment ta’ Malta lil-Litwanja hekk kif qiegħda tipprepara biex tmexxi l-Presidenza tal-Kumitat tal-Ministri tal-Kunsill tal-Ewropa fi Strasburgu f’Mejju.
Fir-rigward tal-kwistjonijiet bilaterali, il-President Vella rrimarka li Malta u l-Litwanja tgħallmu ħafna dwar il-potenzjal u l-opportunitajiet komuni li jistgħu joffru ż-żewġ pajjiżi tagħna: il-kredenzjali ekonomiċi u ta’ investiment tagħna, l-intraprenditorija kummerċjali tagħna, ix-xjenzi tal-ħajja, il-bijoteknoloġija, il-fintech u t-turiżmu, fost oqsma oħrajn.
Qal li Malta tilqa’ l-għażliet kollha possibbli biex jissaħħu r-relazzjonijiet kummerċjali kif ukoll l-inizjattivi kollha immirati biex jippromwovu aktar interazzjoni bejn il-partijiet ikkonċernati kummerċjali rispettivi tagħna.
Il-President Vella kellu wkoll laqgħa uffiċjali mal-Prim Ministru tal-Litwanja, Ingrida Šimonytė.
F’Vilnius, il-President Vella poġġa kuruna tal-fjuri quddiem il-Mafkar iddedikat lil dawk li nqatlu fil-ġlieda għall-Indipendenza tal-Litwanja fiċ-Ċimiterju ta’ Antakalnis.
Matul iż-żjara tiegħu, il-President Vella huwa akkumpanjat minn Alicia Bugeja Said, Segretarju Parlamentari responsabbli mis-Sajd, l-Akwakultura u d-Drittijiet tal-Annimali.
Filgħodu, is-Sinjura Vella kellha programm separat. Flimkien mas-Sinjura Nausėdienė, żaret l-Istitut Nazzjonali tal-Kanċer, istituzzjoni speċjalizzata tal-onkoloġija fil-Litwanja.
Iż-Żjara Uffiċjali ser tkompli għada meta l-President Vella ser jiltaqa’ ma’ Viktorija Čmilytė-Nielsen, speaker tas-Seimas (il-parlament tal-Litwanja), fost impenji skedati oħra.
